مقالة ساخرة - ايه الهابل ده

لأ ما تفهمونيش غلط أنا قصدي على مرصد هابل ، وأنا لم أستوعب الكلمه الا بعد مرورها على أذني عشرات المرات واكتشفت بعد معاناه ومساعدة صديق أنه تليسكوب في الفضاء يلتقط صور شديدة الوضوح لأجرام السماء ، بس مسميينه كده ليه؟ ساعتها سألت نفسي السؤال ده وقلت بما ان الناس دول بيشجعوا أي حاجه والعلم أيضا فيه جنون فعملوا حاجه هابله جايز يكتشفوا حاجه جديده، ماهي ناقصه ، حاجه كده زي الاستنساخ و الشفره الجينيه ، وحدث أن طالب أحد كبار المهندسين في ناسا الرئيس أوباما بالكشف العلني عن معلومات ناسا واللي بتقول انها اكتشفت حقيقية الكائنات الفضائية في مشروع سري وان ناسا كافيه على الخبر ماجور علشان الدنيا ماتتلخبطش أكتر من اللخبطه اللي موجوده ، طبعا الراجل ماسمعناش عنه حاجه تاني ولا عن الموضوع ، وأوباما عمل نفسه مش سامع حاجه ومطنش وكل حد ما يكلمه يقول لهم انا باحل الازمه الماليه ، وايه المشكله لما يكون فيه مخلوقات غريبه مااحنا عايش بينا مخلوقات غريبه أصلا والبشري بيعمل حاجات أغرب من الخيال.

وأفلام كتير شفناها عن غزو جاي من الفضاء واحتلال للكوكب الجميل بتاعنا وكأن هذه الكائنات شريره ولماذا سوء النيه يابني آدم ولا الانانيه ماسكاك حتى على احفاد إي تي (ET) مش جايز يكونوا حلوين ويدلعونا ويضبطوا لنا الدنيا ولا جايز يكونوا طالبين حسنه مننا ولا مساعده.

أما المحطه الفضائيه الدوليه فهي مشروع مشترك تكلفته 100 مليار يورو بين أمريكا وروسيا واليابان وكندا و 10 دول أوروبيه ويوجد عليها رواد باقامه دائمه وحجمها أكبر من ملعب كرة قدم لدرجة انه يمكن مشاهدتها بالعين المجرده ، يعني لما واحد يشاور على نجمه في السما لحبيبته ويقول لها انتي شبه دي يبقى قصده انتي شبه الحديده اتلحلحي شوية واعملي لك منظر.

والرغبه في التحليق نزعه بشرية منذ الأزل ، البشر زهقانين من أيام آدم وحتى اليوم ، ومين فينا مش طهقان ونفسه يكت على بره ويفضل مبحلق لما يشوف طياره في السما ولما يكبر شوية ويعقل يشد خيط الطياره الورق من ايد العيال ويضحك من غير سبب ليه مش عارف ، ويقال أن الفلكي الاغريقي أرخيتاس سنة 400 قبل الميلاد هو أول من صمم آلة طيران وطار بيها لمسافة 200 متر بس ماعملش زي أخونا ابن فرناس ووقع على جدور رقبته.

 

وحكاية تانيه طلعوا لنا فيها ، الأراضي على القمر للبيع ، أي حد يقدر يشتري ، والفدان بأربعين دولار بس ، يابلاش ، أحد الأصدقاء عندما سمع هذا الخبر حكاه لزوجته على سبيل التندر قالت له: ياه ايه الرخص ده ما تشتري لنا حته نبني عليها بيت للعيال ده حتى أرخص من الاراضي الصحراويه بتاعت الحكومه قال لها: واطمن عالارض بتاعتي ازاي مش جايز حد يحط ايده عليها ؟ قالت له: ابقى هات لك هابل صغير وحطه على السطح.

مش بالذمه ده اسمه هبل قصدي هابل