عصر القرود
لا أدري لماذا هذه
الأيام كلما حاولت أن أفهم شيئاً أشعر إني مش فاهم حاجه ووداني بتطول ، وكلما قفزت
خلف الأتوبيس أو وقفت في طابور عيش أشعر وكأني قد تقوس ظهري الى الأسفل وأصبح نظري
أكثر حدة.
ولم ألحظ نظرات الريبة
في وجه بائع اللب عندما طلبت منه خمسة كيلو فول سوداني ، ثم اتصلت بأبي على
المحمول وقلت له : هات لي يا بابا قفص موز وانت جاي ....... لأ طبعا مش كفاية اتنين كيلو.
والظاهر فعلا أن
دمي أصبح خفيفاً وأصبحت باهرج في الفاضية والمليانة واتنطط أكتر من الأول ، وأشعر
بانحياز عاطفي نحو القرود في الجبلاية ، وأشعر بالسعاده عندما أشاهد عالم الحيوان
في ناشونال جيوجرافيك، إلا أن نظرات الشك من أمي زادت هذه الأيام ، وأصبحت تشير
الى الموضوع بكثرة على غير العادة.
وفي الطريق الى المنزل
، أنظر بتمعن واهتمام الى الأشجار وأتمنى أن أبني لي بيتاً خشبياً فوق أحد الفروع
، وعندما عدت الى المنزل وجدت أمي تقول : .... مالك يا ضنايا ...... شعرك طول قوي
وايديك بقت طويلة كده ليه؟ ، فقلت : أحسن يا ماما علشان أطبطب على ظهري بإيدي ، مش
محتاج حاجه من حد . ملحوظة : (يكونش ده السبب ان بابا كان دايماً يقول لي روح
ياحيوان ، تعالى ياحيوان).
و لم أعر الموضوع
اهتماماً ، وفتحت التلفاز لأجد فيلمي المفضل "أبي فوق الشجرة" وقعدت
أتنطط وانا فرحان وفي ايدي صباع موز. وقد
طمأنتني أمي في محاولة منها أن تواسيني : ..... ما تخافش يابني الأعراض دي كانت
بتجيلك زمان ، لما روحت تمتحن ثانوية عامة ، وكل ما تدور على شغل ، بس بتزيد قوي
كل انتخابات مجلس شعب.
ولأن المثل بيقول عالأصل دور ، فقد اشتريت
كتاب "أصل الأنواع" لداروين ، ودخلت غرفتي أقرأ الكتاب ، حينها دخل علي
أبي وفي يدي صباع موز ، فقلت له : تصور يا بابا ان نظرية دارون ليست صحيحة بالكامل
....... ، قال: إزاي يعني يافيلسوف؟ ..... ، قلت: أيوة علشان ماخدناش رأي القرود
في الموضوع ...... ، فضحك أبي مستهزءاً وقال : ..... قال الانسان أصله قرد قال ..
ايه التخلف ده؟ ....... إلا قول لي صحيح ؟....... انت مخبي قفص الموز فين؟